நாளொன்றிற்கு மூன்று கப் காபி குடிப்பதால் நீண்ட நாள் வாழலாம்: ஆனால்...

நாளொன்றிற்கு மூன்று கப் காபி குடித்தால் நீண்டநாள் வாழலாம் என்று கூறியுள்ளார்கள் அறிவியலாளர்கள்.

ஆனால், அது இன்ஸ்டண்ட் காபியாக இருக்கக்கூடாதாம், காபி கொட்டையை வறுத்து அரைத்து தயாரிக்கப்பட்ட காபியாக இருக்கவேண்டுமாம்.

ஆனால், வறுத்து அரைத்து தயாரிக்கப்படும் காபியில்தான் இந்த நன்மைகளாம், இன்ஸ்டண்ட் காபியில் இல்லையாம்.

உலகில் அதிகம் அருந்தப்படும் பானங்களில் காபியும் ஒன்றாகும். இதற்கு முந்தைய ஆய்வுகளில் சில, காபி அருந்துவதால் புற்றுநோய் அபாயம் குறையும் என்றும், type 2 சர்க்கரை வியாதி மற்றும் dementia பிரச்சினைகள் குறையும் என்றும் தெரிவித்துள்ளன.

அதே நேரத்தில், வேறு சில ஆய்வுகள், காபி உயர் இரத்த அழுத்தத்தை ஏற்படுத்தக்கூடியது என்றும், அதனால், இதயநோயால் உயிரிழப்பு ஏற்படும் அபாயம் உள்ளது என்றும் தெரிவித்திருந்தார்கள்.

இந்நிலையில், சமீபத்தில் லண்டன் குயின் மேரி பல்கலை ஆய்வாளர்களும் ஹங்கேரியின் Semmelweis பல்கலை ஆய்வாளர்களும் சுமார் 50,000 பேரிடம் மேற்கொண்ட ஆய்வு ஒன்றில், காபி குடிப்பதால் இரத்த அழுத்தம் உயர்வதில்லை என்றும், காபி இதயத்துக்கு நன்மையைத்தான் உருவாக்குகிறது என்றும் தெரியவந்துள்ளதாக தெரிவித்துள்ளார்கள்.

ஆய்வில் பங்கேற்றவர்கள் 11 ஆண்டுகளாக கண்காணிக்கப்பட்டுவந்துள்ளார்கள். அவர்களில் 22 சதவிகிதத்தினர் காபி அருந்தாதவர்கள், 58 சதவிகிதத்தினர் நாளொன்றிற்கு மூன்று கப் காபி வரை அருந்துபவர்கள்.

ஆய்வின் முடிவுகள், தினமும் அரை முதல் மூன்று கப் காபி வரை அருந்துபவர்களுக்கு, காபி அருந்தாதவர்களை ஒப்பிடும்போது 12 சதவிகிதம் உயிரிழப்பதற்கான வாய்ப்பு குறைவு என காட்டின.

அத்துடன், அவர்கள் இதய பிரச்சினைகளால் இறக்கும் அபாயம் 17 சதவிகிதம் குறைவாக உள்ளதாகவும், பக்கவாதம் தாக்கும் அபாயம் 21 சதவிகிதம் குறைவு என்றும் ஆய்வில் தெரியவந்தது.

மேலும், அவர்களுக்கு சர்க்கரை வியாதி பிரச்சினை ஏற்படுவதற்கான வாய்ப்பும் குறைவு என்பதும் ஆய்வில் தெரியவந்தது. காபி பசியை குறைக்கவல்லது என்பது அதற்கு காரணமாக இருக்கலாம் என ஆய்வாளர்கள் கருதுகிறார்கள்.