போர் நிறுத்தம் கோரவில்லை...இஸ்ரேல் பிரதமருடன் பேசிய பின்னர் ஜோ பைடன் வெளிப்படை

காஸா பகுதியில் போர் உக்கிரமடைந்துள்ள நிலையில், பொதுமக்கள் பாதுகாப்பை உறுதி செய்ய வேண்டும் என்று ஜோ பைடன் இஸ்ரேல் பிரதமர் பெஞ்சமின் நெதன்யாகுவை கேட்டுக்கொண்டதாக வெள்ளைமாளிகை தெரிவித்துள்ளது.

தொலைபேசியில் தொடர்பு கொண்டு

காஸா மக்களின் பாதுகாப்பை உறுதி செய்வதுடன் மனிதாபிமான உதவிகளை முன்னெடுக்க வேண்டும் என்று ஐநா பாதுகாப்பு கவுன்சிலில் தீர்மானம் நிறைவேற்றப்பட்ட நிலையிலேயே அமெரிக்க ஜனாதிபதி ஜோ பைடன் இஸ்ரேல் பிரதமர் நெதன்யாகுவை தொலைபேசியில் தொடர்பு கொண்டுள்ளார்.

@getty

இதில், மனிதாபிமான உதவி நடவடிக்கைக்கு ஆதரவளிப்பவர்கள் உட்பட பொதுமக்களைப் பாதுகாக்க வேண்டியதன் அவசியத்தை ஜனாதிபதி பைடன் வலியுறுத்தியுள்ளதாக கூறப்படுகிறது.

மேலும், தொடர்ந்து சண்டை நடக்கும் பகுதிகளில் இருந்து பொதுமக்கள் பாதுகாப்பாக வெளியேற அனுமதிப்பதன் முக்கியத்துவம் குறித்தும் அவர் விளக்கியதாக வெள்ளைமாளிகை அதிகாரிகள் தெரிவித்துள்ளனர்.

இந்த நிலையில், வெள்ளைமாளிகையில் செய்தியாளர்களிடம் பேசிய ஜோ பைடன், இஸ்ரேல் பிரதமர் நெதன்யாகுவுடன் நீண்ட நேரம் பேசியதாகவும், அது ஒரு தனிப்பட்ட உரையாடல் என்றும் குறிப்பிட்டிருந்தார்.

போர் நிறுத்தம் கோரவில்லை

ஆனால் போர் நிறுத்தம் தொடர்பில் தாம் கோரவில்லை என்றும் ஜோ பைடன் அப்போது பதிலளித்தார். அக்டோபர் 7ம் திகதி காஸா எல்லையில் தெற்கு இஸ்ரேலிய சமூகத்தினர் மீது திடீரெ தாக்குதலை முன்னெடுத்த ஹமாஸ் படைகள் 1400 பேர்களை கொன்றதாக தகவல் வெளியானது.

@epa

ஆனால் தற்போது அந்த இறப்பு எண்ணிக்கை 1,140 என சரிவடைந்துள்ளது. அத்துடன் ஹமாஸ் படைகள் கடத்திச் சென்றவர்களில் 129 பேர்கள் தற்போதும் காஸாவில் பணயக்கைதியாக உள்ளனர்.

ஆனால் ஹமாஸ் படைகளுக்கு பதிலடி தரும் வகையில் இஸ்ரேல் முன்னெடுத்த தாக்குதலில் இதுவரை பாலஸ்தீன மக்கள் 20,000 பேர்களுக்கும் அதிகமாக கொல்லப்பட்டுள்ளனர்.

இதில் சுமார் 7,000 பேர்கள் சிறார்கள் என்றே கூறப்படுகிறது. இருப்பினும், போர் நிறுத்தம் கோரவில்லை என்று அமெரிக்க ஜனாதிபதி வெளிப்படையாக தெரிவித்துள்ளார்.