ஜேர்மனியில் ஆளும் கூட்டணி உடைந்தது: அடுத்து என்ன?

ஜேர்மனியில், ஆளும் கூட்டணிக் கட்சிகளிடையே ஏற்பட்ட கொள்கை வேறுபாடு காரணமாக கூட்டணி உடைந்ததது.

ஜேர்மனியில் ஆளும் கூட்டணி உடைந்தது

ஜேர்மனியில், SPD, The Greens மற்றும் FDP ஆகிய கட்சிகள் இணைந்தே கூட்டணி ஆட்சி அமைத்துள்ளன.

இந்நிலையில், கூட்டணிகளுக்குள் கொள்கை கருத்து வேறுபாடு உருவாகியுள்ளது. ஜேர்மன் அரசில் FDP கட்சியைச் சேர்ந்தவரான Christian Lindner நிதி அமைச்சராக பொறுப்பு வகிக்கிறார்.

அவருக்கும் ஜேர்மன் சேன்ஸலரான ஓலாஃப் ஷோல்ஸுக்கும் ஏற்பட்ட கொள்கை வேறுபாடு காரணமாக, திடீரென Christian Lindnerஐ அவரது பதவியிலிருந்து நீக்கினார் சேன்ஸலர்.

அதைத் தொடர்ந்து, FDP கட்சி, அரசுக்கு அளித்துவந்த ஆதரவை விலக்கிக்கொண்டுள்ளது, அதனால், ஆளும் கூட்டணி உடைந்தது.

முடிக்கவேண்டிய அவசர வேலைகள்

கூட்டணியிலிருந்து FDP கட்சி விலகினாலும், மீதமுள்ள, ஓலாஃப் ஷோல்ஸ் சார்ந்த SPD கட்சியும் , The Greens கட்சியும் இணைந்து, ஏற்கனவே துவக்கப்பட்டுள்ள சில முக்கிய வேலைகளை முடிக்க திட்டமிட்டுள்ளன.

விடயம் என்னவென்றால், அவற்றில் பட்ஜெட் தாக்கல் செய்வதும் ஒன்றாகும். பெரும்பான்மை இல்லாமல் ஷோல்ஸ் எப்படி பட்ஜெட் தாக்கல் செய்யப்போகிறார் என்பது தெரியவில்லை!

அடுத்தகட்ட நடவடிக்கை என்ன?

1. நம்பிக்கையில்லாத் தீர்மானம் மீதான வாக்கெடுப்பு

ஜேர்மன் சேன்ஸலர் ஓலாஃப், தன் மீதான நம்பிக்கையில்லாத் தீர்மானத்தை எதிர்கொள்ளவேண்டும். நம்பிக்கையில்லாத் தீர்மானம் மீதான வாக்கெடுப்பு, ஜனவரி மாதம் 15ஆம் திகதி நடைபெறலாம் என எதிர்பார்க்கப்படுகிறது.

2. நாடாளுமன்றம் கலைப்பு

ஜேர்மன் சேன்ஸலர் ஓலாஃப் மீதான நம்பிக்கையில்லாத் தீர்மானம் வெற்றி பெறும் பட்சத்தில், அதாவது, அவருக்கு போதுமான நாடாளுமன்ற உறுப்பினர்களின் ஆதரவு கிடைக்கவில்லையானால், அவர் பெடரல் ஜனாதிபதியான Frank-Walter Steinmeierஇடம், நாடாளுமன்றத்தைக் கலைக்க பரிந்துரைப்பார்.

அரசு நீடிக்க இயலாது என தெரியவரும் பட்சத்தில், தேர்தலுக்கு வழிவகுக்கும் வகையில், 21 நாட்களுக்குள் ஜனாதிபதி நாடாளுமன்றத்தைக் கலைப்பார்.

3. முன்கூட்டியே தேர்தல்

வழக்கமாக ஜேர்மனியில் செப்டம்பர் மாதத்தில் தேர்தல் நடைபெறும் நிலையில், இம்முறை முன்கூட்டியே மார்ச் மாதத்தில் தேர்தல் நடத்தப்படும்.

4. புதிய அரசு

அடுத்ததாக அமையும் ஆட்சி வித்தியாசமான கூட்டணிகளைக் கொண்டிருக்கும் என சமீபத்திய ஆய்வுகள் தெரிவிக்கின்றன.

கூட்டணியிலிருந்து அகற்றப்பட்ட FDP கட்சிக்கு போதுமான வாக்குகள் கிடைக்காது என்றும், அதனால், CDU/CSU மற்றும் SPD கட்சிகள் இணைந்து கூட்டணி ஆட்சி அமையலாம் என்றும் கருத்துக்கணிப்புகள் கூறுகின்றன.

விடயம் என்னவென்றால், 2021ஆம் ஆண்டு நடைபெற்ற ஜனாதிபதி தேர்தலுக்குப் பின், அரசு அமைக்க கூட்டணிக் கட்சிகள் 71 நாட்கள் எடுத்துக்கொண்டன.

இம்முறையும், அதேபோல நடந்தாலும் ஆச்சரியமில்லை என்கின்றன உள்ளூர் ஊடகங்கள்.