லங்காசிறி FM
எண்ணெய் தட்டுப்பாடு இன்னும் நீடிக்கும்... புதிய குண்டை வீசிய சவுதி அரேபியா
ஹார்முஸ் நீரிணையில் கப்பல் போக்குவரத்து மீண்டும் அனுமதிக்கப்படுவதை வரவேற்றுள்ள சவுதி நிதியமைச்சர், மத்திய கிழக்கின் நிலைமை மிகவும் நிலையற்றதாகவே தொடரும் என்று எச்சரித்தார்.
நிலையற்றதாகவே இருக்கும்
ஈரான் ஹார்முஸ் நீரிணையில் கப்பல் போக்குவரத்தை மீண்டும் அனுமதிக்கவுள்ளதாகவும், இதன் மூலம் எண்ணெய் ஏற்றுமதிகள் மீண்டும் தொடங்குவதற்கான வழிவகை செய்யப்பட்டுள்ளதாகவும் வெளியான செய்தியை, சவுதி நிதியமைச்சர் முகமது அல்-ஜதான் வரவேற்றுள்ளார்.
ஆனால், ஒரு நீடித்த பதற்றத் தணிப்பு எட்டப்படும் வரை மத்திய கிழக்கில் நிலைமை மிகவும் நிலையற்றதாகவே இருக்கும் என்றும் அவர் எச்சரித்துள்ளார்.
மேலும், சில நாடுகள் தங்கள் எண்ணெய் உற்பத்தித் திறனை விரைவாக மீட்டெடுக்க முடியும், ஆனால் மற்ற நாடுகளுக்கு, அவை சந்தித்த சேதத்தின் அளவைப் பொறுத்து, அதிக காலம் தேவைப்படும் எனவும் அல்-ஜதான் சுட்டிக்காட்டியுள்ளார்.
வாஷிங்டனில் நடைபெற்ற ஐஎம்எஃப் (IMF) மற்றும் உலக வங்கியின் வசந்தகாலக் கூட்டங்களின்போது நடந்த ஒரு செய்தியாளர் சந்திப்பில் பேசிய அவர், மிகப்பெரிய சவால் என்பது, எண்ணெய் மற்றும் இயற்கை எரிவாயு உற்பத்தியை எந்த அளவுக்கு அதிகரிக்க முடியும் என்பது அல்ல; மாறாக, அவற்றின் ஏற்றுமதிகளுக்கு ஆதரவளிக்கக் காப்பீட்டாளர்கள் தயக்கம் ஏதுமின்றி முன்வருவார்களா என்பதே ஆகும் என்றார்.
தற்போதைய போர்நிறுத்தம் இன்னும் சில நாட்களில் முடிவடையவுள்ளதாக குறிப்பிட்ட அல்-ஜதான், அது நீட்டிக்கப்பட்டு, அதன் விளைவாக பதற்றம் தணியும் என்று தான் நம்புவதாகவும் தெரிவித்தார்.
முடிவுக்குக் கொண்டுவரும்
இஸ்ரேலுக்கும் லெபனானுக்கும் இடையே வியாழக்கிழமை ஒப்புக்கொள்ளப்பட்ட 10 நாள் போர் நிறுத்த ஒப்பந்தத்தின் அடிப்படையில் எஞ்சிய நாட்களுக்கு ஹார்முஸ் நீரிணை கப்பல் போக்குவரத்திற்கு திறந்திருக்கும் என்று ஈரான் வெள்ளிக்கிழமை கூறியது.
அதேவேளையில், ஈரான் போரை முடிவுக்குக் கொண்டுவரும் ஒரு ஒப்பந்தத்திற்கு விரைவில் வழிவகுக்கக்கூடிய பேச்சுவார்த்தைகள் இந்த வார இறுதியில் ஈரானுடன் நடைபெறலாம் என்று அமெரிக்க ஜனாதிபதி டொனால்ட் ட்ரம்ப் கூறினார்.
ஈரான் மீது அமெரிக்காவும் இஸ்ரேலும் பிப்ரவரி 28 அன்று தாக்குதல் தொடங்கிய நிலையில், பதிலடியாக வளைகுடா அண்டை நாடுகள் மீது ஈரான் தாக்குதல்களைத் தொடுத்தது.
ஈரான் மீதான தாக்குதல் ஹார்முஸ் நீரிணை முடக்கம் என இறுக்கமடைந்த நிலையில், லெபனானில் இஸ்ரேல்-ஹிஸ்புல்லா மோதல் மீண்டும் வலுப்பெற்றது.
ஈரான் போர் தொடர்பில் கடும் நெருக்கடியை எதிர்கொண்டுள்ள ஜனாதிபதி ட்ரம்ப், இஸ்ரேலின் அழுத்தத்தை புறந்தள்ளி 10 நாட்கள் போர் நிறுத்தத்தை அமுலுக்கு கொண்டுவந்தார் என்பது குறிப்பிடத்தக்கது.
| உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள். |
புங்குடுதீவு 11ம் வட்டாரம், கொக்குவில் மேற்கு, சென்னை, India, வெள்ளவத்தை
15 Apr, 2026
சுழிபுரம் மேற்கு, London, United Kingdom
21 Apr, 2024
வேலணை கிழக்கு, Cambridge, United Kingdom, கொலம்பஸ், United States
17 Apr, 2019
