மத்திய கிழக்கில் அமெரிக்கத் தளங்கள் குறிவைக்கப்பட்டதன் பின்னணி: ஜெலென்ஸ்கி வெளிப்படை

சவுதி அரேபியா இராணுவத் தளத்தின் மீது ஈரான் தாக்குதல் நடத்துவதற்கு முந்தைய நாட்களில், மத்திய கிழக்கு முழுவதும் அமைந்துள்ள அமெரிக்க மற்றும் நேச நாடுகளின் இராணுவத் தளங்களை ரஷ்யா செயற்கைக்கோள் மூலம் கண்காணித்தது என ஜெலென்ஸ்கி தெரிவித்துள்ளார்.

ஈரானுக்கு உதவி

வளைகுடா நாடான கத்தாரில் செய்தியாளர்களை சந்தித்த உக்ரைன் ஜனாதிபதி ஜெலென்ஸ்கி, ரஷ்யா அத்தகைய உளவுத் தகவல்களை ஈரானுடன் பகிர்ந்துகொண்டதாகவும், அப்பிராந்தியத்தில் உள்ள அமெரிக்கப் படைகளை இலக்குவைக்க ஈரானுக்கு உதவியதாகவும் தாம் 100 சதவீதம் உறுதியாக இருப்பதாகவும் தெரிவித்துள்ளார்.

மார்ச் 24 முதல் 26 வரையிலான காலகட்டத்தில், ரஷ்யச் செயற்கைக்கோள்கள் பல முக்கியத்துவம் வாய்ந்த இடங்களை ஈரானுக்காக படம்பிடித்துள்ளதாகக் காட்டும் உளவுத் தகவல்களைப் பெற்றிருப்பதாக ஜெலென்ஸ்கி தெரிவித்தார்.

குதிக்கும் எண்ணெய் விலை... ஈரான் போரால் ஆசியப் பங்குச் சந்தைகள் சரிவு

மார்ச் 24 அன்று, சாகோஸ் தீவுக்கூட்டத்தில் உள்ள டியாகோ கார்சியாவில் அமைந்துள்ள அமெரிக்க-பிரித்தானிய இராணுவத் தளம், குவைத் சர்வதேச விமான நிலையம் மற்றும் கிரேட்டர் பர்கன் எண்ணெய் வயலின் சில பகுதிகள் உள்ளிட்ட பல முக்கிய இடங்களின் படங்களை ரஷ்ய செயற்கைக்கோள்கள் பதிவு செய்ததாக ஜெலென்ஸ்கி தெரிவித்தார்.

உளவுத் தகவல்

சவுதி அரேபியாவில் இளவரசர் சுல்தான் விமானத் தளம் புகைப்படம் எடுக்கப்பட்டதாகவும் அவர் குறிப்பிட்டுள்ளார். மார்ச் 26 அன்று, சவுதி அரேபியாவில் உள்ள ஷைபா எண்ணெய் மற்றும் எரிவாயு வயல், துருக்கியில் உள்ள இன்சிர்லிக் விமானத் தளம் மற்றும் கத்தாரில் உள்ள அல் உதேத் விமானத் தளம் போன்ற கூடுதல் இடங்களும் புகைப்படமாகப் பதிவு செய்யப்பட்டதாகவும் ஜெலென்ஸ்கி சமூக ஊடகத்தில் குறிப்பிட்டுள்ளார்.

அத்துடன், தடைகள் நீக்கப்பட்டு நாள்தோறும் வருவாய் ஈட்டிவரும் ஓர் ஆக்கிரமிப்பாளர், அமெரிக்க, மத்திய கிழக்கு, பிரித்தானிய மற்றும் அமெரிக்கத் தளங்கள் உள்ளிட்டவற்றிற்கு எதிரான தாக்குதல்களுக்குத் தேவையான உளவுத் தகவல்களை வழங்கி வருகிறார் என்றும் ஜெலென்ஸ்கி ரஷ்யாவை குறிப்பிட்டுள்ளார்.

ரஷ்யாவை ஓர் ஆக்கிரமிப்பாளர் என்று அழைத்ததோடு, அதன் மீதான தடைகள் ஏன் தளர்த்தப்பட்டன என்றும் உக்ரைன் ஜனாதிபதி கேள்வி எழுப்பி மறைமுகமாக அமெரிக்காவை குற்றஞ்சாட்டினார்.