மிக மோசமானதாக இருக்கட்டும்... ஈரான் தாக்குதல் தொடர்பில் இராணுவத்திற்கு ட்ரம்ப் உத்தரவு

ஈரான் மீது மிகக் கடுமையான புதிய தாக்குதல்களை நடத்தப்போவதாக ட்ரம்ப் எச்சரித்துள்ள நிலையில், இந்த வார இறுதியிலேயே இத்தாக்குதல் நடைபெறக்கூடும் என்று தகவல்கள் தெரிவிக்கின்றன.

அவர்கள் கெஞ்சுவார்கள்

வால் ஸ்ட்ரீட் ஜர்னல் வெளியிட்டுள்ள செய்தியின் அடிப்படையில், ஈரானைச் சரணடையச் செய்யும் நோக்கில், அந்த நாட்டின் மீது புதிய உக்கிரத் தாக்குதல் ஒன்றை நடத்துமாறு ட்ரம்ப் ராணுவத்திற்கு உத்தரவிட்டுள்ளார்.

மேரிலாண்டில் உள்ள ஜனாதிபதியின் ஓய்வு இல்லமான 'கேம்ப் டேவிட்'-இல் வெள்ளிக்கிழமை நடைபெற்ற அமைச்சரவைக் கூட்டத்தின்போது பேசிய ட்ரம்ப், அமெரிக்கா முன்னெடுக்கும் தாக்குதலில், இனி எங்களால் இதைத் தாங்கிக்கொள்ள முடியாது என்று அவர்கள் கெஞ்சுவார்கள் என்று குறிப்பிட்டுள்ளார்.

மேலும், ஈரானுடனான இந்தப் போரில் நாம் வென்றே ஆகவேண்டும் என குறிப்பிட்டுள்ள ட்ரம்ப், அவர்கள் மீது தாம் நம்பிக்கை இழந்து வருவதாகவும், நாளுக்கு நாள் அவர்கள் பொய் சொல்கிறார்கள், தவறாகப் பொருள் கொள்கிறார்கள் என்றும் ட்ரம்ப் தெரிவித்துள்ளார்.

ஈரானின் எரிசக்தி உள்கட்டமைப்பு இலக்குகள் மற்றும் சுத்திகரிப்பு நிலையங்களுக்கு எதிராக, இதுவரை மேற்கொள்ளப்பட்டவற்றிலேயே மிகக் கடுமையான குண்டுவீச்சு நடவடிக்கைகளில் ஒன்றாக அமையக்கூடிய தாக்குதலை அமெரிக்காவும் இஸ்ரேலும் திட்டமிட்டு வருவதாக அதிகாரிகள் தெரிவித்துள்ளதாக சிபிஎஸ் (CBS) செய்தி வெளியிட்டுள்ளது.

ஸ்பெயினுக்குள் புகுந்த 60,000 புலம்பெயர்ந்தோர்... எச்சரிக்கை விடுத்த ஐரோப்பா

ஈரான் மீது அப்படியான ஒரு உக்கிரத் தாக்குதல் நடத்தப்பட்டால், அமெரிக்கா-ஈரான் இடையிலான போர்நிறுத்தத்தை அடுத்து, நிறுத்தி வைக்கப்பட்டிருந்த போர் நடவடிக்கைகளில் இஸ்ரேல் மீண்டும் ஈடுபடுவது இதுவே முதல் முறையாக அமையக்கூடும்.

மேலும், அமெரிக்க மற்றும் உலகப் பொருளாதாரத்தின் மீது தாக்குதல் நடவடிக்கை ஏற்படுத்தக்கூடிய தாக்கம் குறித்த கவலை காரணமாக, திங்கட்கிழமை நிதிச் சந்தைகள் திறப்பதற்குள் குண்டுவீச்சுகளை முடிவுக்குக் கொண்டுவருவது குறித்து அதிகாரிகள் விவாதித்துள்ளனர்; இருப்பினும், அந்தப் பேச்சுவார்த்தைகளுக்கு எந்தவொரு முடிவும் எட்டப்படவில்லை.

நிலையற்ற தன்மை

ஈரான் மீதானத் தாக்குதல் தொடர்பில் இஸ்ரேலியர்களுக்கும் தகவல் தெரிவிக்கப்பட்டுள்ளது. ஆனால், ராணுவம் தயார் நிலையில் இருக்க, கடைசி உத்தரவை இதுவரை ட்ரம்ப் வழங்கவில்லை என்றே தகவல் வெளியாகியுள்ளது.

ஈரான் மீது அமெரிக்காவும் இஸ்ரேலும் இணைந்து நடத்திய ராணுவத் தாக்குதல்களைத் தொடர்ந்து பிப்ரவரி 28-ஆம் திகதி தொடங்கிய போரில், கடந்த மாதம் ஒரு போர்நிறுத்தம் எட்டப்பட்டது.

இருப்பினும், அமெரிக்காவும் ஈரானும் தொடர்ந்து ஒன்றையொன்று தாக்கிக்கொண்டதால், அப்பிராந்தியத்தில் பரவலான நிலையற்ற தன்மை உருவானது.

அதனைத் தொடர்ந்து, ஹார்முஸ் நீரிணையை ஈரான் முடக்கியது; இதனால் கச்சா எண்ணெய், இயற்கை எரிவாயு மற்றும் உரங்கள் ஆகியவற்றின் முக்கியமான கடல்வழிப் போக்குவரத்து நிறுத்தப்பட்டது.

பாரசீக வளைகுடா நாடுகளைக் குறிவைத்து நடத்தப்பட்ட ஈரானிய ட்ரோன் மற்றும் ஏவுகணைத் தாக்குதல்கள், கடுமையான செயல்பாட்டு மற்றும் பொருளாதார இடையூறுகளை ஏற்படுத்தின.