சீன ஜனாதிபதியுடன் சந்திப்பு... அடுத்த சில மணி நேரத்தில் தைவானை மிரட்டிய ட்ரம்ப்

சீனாவிடமிருந்து முறையாகச் சுதந்திரத்தை அறிவிப்பதற்கு எதிராக, அமெரிக்க ஜனாதிபதி டொனால்ட் ட்ரம்ப் தைவானை எச்சரித்துள்ளார்.

சுதந்திரத்தை அறிவிக்க

அமெரிக்க ஜனாதிபதி ட்ரம்ப் வெள்ளிக்கிழமையன்று ஃபாக்ஸ் நியூஸிடம் தெரிவிக்கையில், யாரேனும் சுதந்திரம் பெற்றுத் தனித்துச் செல்வதை தாம் விரும்பவில்லை என குறிப்பிட்டுள்ளார்.

சீன ஜனாதிபதி ஜி ஜின்பிங் உடனான இரண்டு நாள் சந்திப்புக்கு பிறகே, ட்ரம்பின் இந்த கருத்து வெளியாகியுள்ளது. ஆனால், தைவான் தன்னை ஏற்கனவே ஒரு இறையாண்மை கொண்ட நாடாகக் கருதுவதால், அது முறைப்படியான சுதந்திரத்தை அறிவிக்கத் தேவையில்லை என்று தைவான் ஜனாதிபதி லாய் சிங்-தே பதிலளித்துள்ளார்.

அமெரிக்கா நீண்ட காலமாக தைவானை ஆதரித்து வருகிறது; சட்டப்படி அதற்குத் தற்காப்பு வழிமுறைகளை வழங்க அது கடமைப்பட்டுள்ளது. ஆனால், சீனாவுடனான தூதரக உறவைப் பேணுவதோடு இந்தக் கூட்டணியை அமெரிக்கா அடிக்கடி சமன் செய்ய வேண்டியிருந்தது.

வெனிசுலாவின் மதுரோவை அடுத்து... ஒரு நாட்டின் ஜனாதிபதியை சிக்கவைக்க அமெரிக்கா தீவிரம்

தைவான் தொடர்பில், எந்த வகையிலும் தான் எந்த உறுதிமொழியும் அளிக்கவில்லை என்று ட்ரம்ப் முன்னர் கூறியிருந்தார். தைவானை தனது நிலப்பகுதியின் ஒரு பகுதியாக உரிமை கோரும் சீனா, பலவந்தமாகப் கைப்பற்றும் வாய்ப்பையும் நிராகரிக்கவில்லை.

மேலும், தைவானின் சுதந்திரத்தை ஆதரிக்கவில்லை என்பதே அமெரிக்காவின் உறுதியான நிலைப்பாடாகும். மட்டுமின்றி, தைவானின் ஜனாதிபதி மீதான தனது வெறுப்பை சீனா வெளிப்படையாகக் கூறி வருகிறது; அவரை முன்னர் ஒரு குழப்பவாதி என்றும், இருதரப்பு அமைதியைச் சீர்குலைப்பவர் என்றும் சீனா விமர்சித்துள்ளது.

உறுதியான நிலைப்பாடு

பல தைவானியர்கள் தங்களை ஒரு தனி தேசத்தின் குடிமக்களாகவே கருதுகின்றனர், இருப்பினும், அவர்களில் பெரும்பாலோர், தைவான் சீனாவிலிருந்து சுதந்திரத்தை அறிவிக்காமலும் அதே சமயம் அதனுடன் இணையாமலும் இருக்கும் தற்போதைய நிலையையே தக்கவைத்துக்கொள்வதற்கு ஆதரவாக உள்ளனர்.

ஃபாக்ஸ் நியூஸிடம் ட்ரம்ப் தெரிவிக்கையில், தைவானுக்கு ஆதரவாக 9500 மைல்கள் பயணித்து நாம் போர் தொடுக்க வேண்டும். அப்படியான ஒரு சூழலை தாம் எதிர்கொள்ள விரும்பவில்லை. தைவானும் சீனாவும் இந்த விவகாரத்தில் இணக்கத்தைப் பேண வேண்டும் என்றும் ட்ரம்ப் குறிப்பிட்டுள்ளார்.

மேலும், தைவான் விவகாரத்தில் சீனாவுக்கு எதிராக அமெரிக்கா களமிறங்குமா என்பது குறித்து தாம் சீன ஜனாதிபதியிடம் விவாதிக்கவில்லை என்றும் ட்ரம்ப் குறிப்பிட்டுள்ளார்.

மட்டுமின்றி, தைவான் குறித்து ஜி ஜின்பிங் மிகவும் உறுதியான நிலைப்பாட்டைக் கொண்டுள்ளார் என்றும், அங்கு ஒரு சுதந்திர இயக்கத்தை அவர் காண விரும்பவில்லை என்றும் ட்ரம்ப் கூறினார்.

சமீப ஆண்டுகளில், சீனா அந்தத் தீவைச் சுற்றித் தனது இராணுவப் பயிற்சிகளைத் தீவிரப்படுத்தியுள்ளது; இது அப்பிராந்தியத்தில் பதற்றத்தை அதிகரிப்பதுடன், அமெரிக்கா இந்த விவகாரத்தில் தலையிடுமா என்பதையும் அடிக்கடி சோதித்துப் பார்க்கிறது என்பது குறிப்பிடத்தக்கது.