இந்தியா-பாகிஸ்தான் மோதல்: லாகூருக்கு பயணிக்க வேண்டாம்: அமெரிக்காவின் அதிரடி அறிவுறுத்தல்!

இந்தியா-பாகிஸ்தான் இடையே போர் பதற்றம் அதிகரித்துள்ள நிலையில், அமெரிக்கர்களுக்கு அந்நாட்டு அரசு பயண கட்டுபாடு விதித்துள்ளது.

அமெரிக்கர்களுக்கு பயண எச்சரிக்கை

காஷ்மீரின் பஹல்காமில் நிகழ்ந்த பயங்கரவாத தாக்குதலுக்கு இந்திய ராணுவம் பதிலடி கொடுத்ததை தொடர்ந்து, பாகிஸ்தானின் லாகூர் மற்றும் அதன் சுற்றுவட்டார பகுதிகளில் வசிக்கும் அமெரிக்க குடிமக்கள் மற்றும் தூதரக அதிகாரிகளுக்கு அமெரிக்கா பயண எச்சரிக்கை விடுத்துள்ளது.

கடந்த ஏப்ரல் 22ஆம் திகதி, அமைதியான பள்ளத்தாக்கான பஹல்காமில் நடந்த கொடூரமான பயங்கரவாத தாக்குதலில் 26 சுற்றுலா பயணிகள் பரிதாபமாக உயிரிழந்தனர். இந்த சம்பவத்திற்கு காரணமான பயங்கரவாத குழுக்களுக்கு தக்க பதிலடி கொடுக்க இந்தியா உடனடியாக களத்தில் இறங்கியது.

ஆபரேஷன் சிந்தூர்

இந்த தாக்குதலுக்கு பதிலடியாக இந்திய ராணுவம் 'ஆபரேஷன் சிந்தூர்' என்ற பெயரில் ஒரு துல்லியமான பதிலடி நடவடிக்கையை இந்தியா மேற்கொண்டது.

 நம்பத்தகுந்த வட்டாரங்களின்படி, இந்த நடவடிக்கையில் பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் செயல்பட்டு வந்த ஒன்பது பயங்கரவாத முகாம்கள் வெற்றிகரமாக அழிக்கப்பட்டுள்ளன.

ஆபரேஷன் சிந்தூர் பெயரை சொந்தமாக்க கடும் போட்டி - ரிலையன்ஸ் விலகியது ஏன்?

எல்லை பதற்றம் அதிகரிப்பு

இதன் விளைவாக, இந்தியா மற்றும் பாகிஸ்தான் இடையே உள்ள எல்லைக் கட்டுப்பாட்டு கோடு பகுதியில் தொடர்ந்து பதற்றமான சூழல் நிலவி வருகிறது.

இரு தரப்பிலும் அவ்வப்போது துப்பாக்கி சண்டைகள் நிகழ்ந்து வருவதால், எல்லை கிராமங்களில் வசிக்கும் மக்கள் உயிரிழக்கும் அபாயம் ஏற்பட்டுள்ளது.

லாகூருக்கு பயணிக்க வேண்டாம்!

லாகூரில் உள்ள பாகிஸ்தானின் வான் பாதுகாப்பு அமைப்பை இந்திய ராணுவம் சேதப்படுத்தியதாக இந்திய பாதுகாப்பு அமைச்சகம் அதிகாரப்பூர்வமாக தெரிவித்துள்ளது.

பாகிஸ்தானும் இந்த தகவலை ஒப்புக்கொண்டுள்ளதால், இப்பிரச்சனை மேலும் தீவிரமடைந்துள்ளது.

பாகிஸ்தானில் இந்தியாவின் ராணுவ நடவடிக்கைகள் தீவிரமடைந்துள்ள நிலையில்,  இந்த நிலையற்ற சூழலில், பாகிஸ்தானின் லாகூர் நகரம் மற்றும் அதன் சுற்றுப்புறங்களில் வசிக்கும் அமெரிக்க குடிமக்கள் மிகுந்த எச்சரிக்கையுடன் இருக்க வேண்டும் என்றும், அத்தியாவசியமற்ற பயணங்களைத் தவிர்க்க வேண்டும் என்றும் அமெரிக்கா அறிவுறுத்தியுள்ளது.

குறிப்பாக லாகூர் நகரின் முக்கிய பகுதிகளுக்கு செல்வதை தவிர்க்குமாறு அமெரிக்க தூதரகம் தனது பயண எச்சரிக்கையில் திட்டவட்டமாக தெரிவித்துள்ளது.

அமெரிக்காவின் பயண எச்சரிக்கையில், “தொடர்ச்சியான ட்ரோன் தாக்குதல்கள் மற்றும் வான்வெளி ஊடுருவல்களுக்கான சாத்தியக்கூறுகள் இருப்பதால், லாகூரில் உள்ள அமெரிக்க துணை தூதரக அதிகாரிகள் அனைவரும் பாதுகாப்பாக இருக்க அறிவுறுத்தப்படுகிறார்கள்.

அமெரிக்க குடிமக்கள் தாக்குதல் அபாயம் உள்ள பகுதிகளுக்கு பயணம் செய்வதை தவிர்க்க வேண்டும்.” இந்த எச்சரிக்கை லாகூரில் உள்ள அமெரிக்கர்கள் மத்தியில் பெரும் கலக்கத்தை ஏற்படுத்தியுள்ளது.